სარსალ (ჩარშამა სარე სალე)
უმთავრესი დღესასწაულია ახალი წელი – ჩარშამა სორ (ოთხშაბათის დღესასწაული) ან სარსალ (ახალი წელი), რომელიც აღმოსავლური კალენდრით აპრილის პირველ ოთხშაბათს აღინიშნება. ეზიდები ამ დღეს კვერცხებს სხვადასხვაფრად ღებავენ და ნაჭუჭებს მინდორში ფანტავენ, აცხობენ ქადებს, სახლის შესასვლელ კარებს გარედან მინდვრის წითელი ყვავილებით რთავენ. ამ დღეს ქალები საფლავზეც გადიან. ეზიდები ახალი წლის ღამეს ლალიშის ტაძარში ხვდებიან, დაბნელებისთანავე სასულიერო პირები ღვთაებრივ ცეცხლს ტაძრიდან გამოიტანენ და ეზიდები ზეთით გაჟღენთილ ფითილებს ცეცხლს უკიდებენ. აღსანიშნავია, რომ აპრილის თვე წმინდად ითვლება, რის გამოც დაქორწინება იკრძალება. |
 |
